ಮಕ್ಕಳ ಪದ್ಯ

ಪುಟ್ಟ ಗುಬ್ಬಿ ಮರಿಯೊಂದು ಹಾರಿ ಬಂದು ಕುಳಿತಿತು ಅಂಗಳದಲಿ ಬಿದ್ದ ಕಾಳನು ಹೆಕ್ಕಿ ಹೆಕ್ಕಿ ತಿಂದಿತು ಚಿಂವ್ ಚಿಂವ್ ಎನ್ನುತಾ ಹಾಡನೊಂದು ಹಾಡಿತು ಪುರ್ ಎಂದು ರೆಕ್ಕೆ ಬಡಿದು ಎತ್ತರದ ಬಾನಿಗೆ ಹಾರಿತು ಕಾಳು ತಿಂದ ಖುಷಿಯಲಿ ತನ್ನ ಗೂಡು ಹುಡುಕಿತು ಸೂರ್ಯ ಮುಳುಗಿ ಆಗ ಕತ್ತಲೆಯು ಕವಿಯಿತು ತನ್ನ ಗೂಡು ಕಾಣದೆ ಗುಬ್ಬಿ ಮರಿಯು ದುಃಖಗೊಂಡಿತು ಹಾರಿ ಆಯಾಸಗೊಂಡು ಮರದ ಮೇಲೆ ಕುಳಿತಿತು ಅಮ್ಮ ಗುಬ್ಬಿ ಮರಿಯ ಹುಡುಕುತ ಅಲ್ಲಿ ಬಂದಿತು ತನ್ನ ಮರಿಯ ಕಂಡು ಹಿಗ್ಗಿ ಗೂಡಿಗೆ ಕರೆದೊಯ್ದಿತು

ಒಂಟಿಯಾಗಿ ಬದುಕಲು ಸಾಧ್ಯವಿಲ್ಲ ಮಗುವೇ ನಮಗೆ ಬದುಕಲು ಬೇಕು ಸುಂದರ ಜೀವನವೇ ಅಜ್ಜ-ಅಜ್ಜಿ, ಅತ್ತೆ-ಮಾವ, ಅಕ್ಕ-ಅಣ್ಣನೊಂದಿಗೆ ಜೀವನ ನೆರೆ-ಹೊರೆಯವರೊಂದಿಗೆ ಬೆರೆತು ಬಾಳಲು ನಂದನ ಶಾಲೆಯಲಿ ಬೇಕು ಗುರುವು ಒಳ್ಳೆಯ ಸಹಪಾಠಿಗಳು ಎಲ್ಲರೊಂದಿಗೆ ನಗುತಲಿದ್ದರೆ ಸುಂದರವು ಈ ಬಾಳು ಒಂದು ಅಗುಳ ಕಂಡರೆ ಹಂಚಿ ತಿನ್ನುವುದು ಕಾಗೆ ಪ್ರಾಣಿ-ಪಕ್ಷಿಗಳು ಸಹ ಬದುಕಲಿ ಬೇಕು ನಮಗೆ ಮರದ ಜೊತೆಯಲಿ ಬಳ್ಳಿಯ ಸಹ ಜೀವನ ಸಸ್ಯ ಸಂಕುಲ ಇರಲು ಬಾಳು ವಿನೂತನ

ಬಾ ಬಾರೆ ನವಿಲೆ ಬಾ ಬಾರೆ ನವಿಲೆ ಓ ನವಿಲೆ ಆಡುವ ಬಾ ಬಾರೆ ನವಿಲೆ ||ಪ|| ಗೆಜ್ಜೆಯ ಕಟ್ಟಿ ಕುಣಿಯುವ ಬಾರೆ ಹೆಜ್ಜೆಯ ಹಾಕಿ ನಲಿಯುವ ಬಾರೆ ಕೋಗಿಲೆಯಂತೆ ಹಾಡುವ ಬಾರೆ ಕೊಳದ ನೀರಲಿ ಈಜುವ ಬಾರೆ ||೧|| ಗರಿಗಳ ಬಿಚ್ಚಿ ನರ್ತಿಸುವ ಬಾರೆ ಹಣ್ಣನು ಕುಕ್ಕಿ ಮೆಲ್ಲುವ ಬಾರೆ ಹಸಿರ ಸಿರಿಯಲಿ ಓಡುವ ಬಾರೆ ಬಣ್ಣದ ಹೂವ ಕೊಯ್ಯುವ ಬಾರೆ ||೨|| ಸಾವಿರ ಕಣ್ಣಿನ ನವಿಲೆ ಬಾರೆ ಕೃಷ್ಣನ ಮೆಚ್ಚಿನ ನವಿಲೆ ಬಾರೆ ರಾಷ್ಟ್ರ ಪಕ್ಷಿ ನವಿಲೆ ಬಾರೆ ಅಂದ ಚೆಂದದ ನವಿಲೆ ಬಾರೆ ||೩|| ಮಳೆಯಲಿ ನೆನೆಯುವ ಬಾರೆ ಹೊಂಬಿಸಲಲಿ ಕೂರುವ ಬಾರೆ ನಿನ್ನ ಸೊಬಗ ತೋರಲು ಬಾರೆ ನಮ್ಮೊಡನಾಡಲು ಬೇಗನೆ ಬಾರೆ ||೪|| ನವಪರ್ವ ಫೌಂಡೇಶನ್ : ಉತ್ತಮ ಸ್ಥಾನ  10/07/2020

  ಆನೆಯೊಂದು ಬಂದಿತು ಕೆಂಪು ಹೂವ ತಂದಿತು ಜೊತೆಗೆ ಹಕ್ಕಿ ಬಂದಿತು  ಚಿಂವ್ ಚಿಂವ್ ಎಂದಿತು ಪುಟ್ಟ ಮಗುವು ನೋಡಿತು  ಕುಣಿದು ಕೇಕೇ ಹಾಕಿತು  ಮುದದಿ ನಕ್ಕು ನಲಿಯಿತು ಹೂವು ಬೇಕು ಎಂದಿತು ಆನೆ ಬಳಿಗೆ ಹೋಯಿತು ಕಬ್ಬನು ಮಗುವು ನೀಡಿತು ಹೂವನು ಪಡೆಯಿತು  ಸಂಸತದಿ ನಲಿಯಿತು ಕಾಳುಗಳನು ತಂದಿತು ಪುಟ್ಟ ಹಕ್ಕಿಗೆ ನೀಡಿತು ಹಕ್ಕಿ ಹೆಕ್ಕಿ ಹೆಕ್ಕಿ ತಿಂದಿತು ಮಗುವು ಪುಳಕಗೊಂಡಿತು ಖಿದ್ಮ ಫೌಂಡೇಶನ್ : ಅತ್ಯುತ್ತಮ ಸ್ಥಾನ  28/07/2020

ಬಹಳ ಚೂಟಿಯು  ನಮ್ಮ ಪುಟ್ಟನು ಬೇಸರ ಕಳೆಯಲು ನಾಯಿಯ ಸಾಕಿದನು ಟಾಮಿ ಎಂದು ಮುದ್ದು ನಾಯಿಯ ಹೆಸರು ನಿಯತ್ತೆ ಆಗಿಹುದು ನಾಯಿಯ ಉಸಿರು ಒಡೆಯನಿಗಾಗಿ ಕೊಡುವುದು ಪ್ರಾಣ ಮಾಡದು ಎಂದೂ ನಂಬಿಕೆಯ ಹರಣ ಕ್ಷಣವೂ ಬಿಡದೆಯೆ ಮನೆಯ ಕಾಯುವುದು ಹಾಕಿದ ತುಂಡು ರೊಟ್ಟಿಯ ತಿನ್ನುವುದು ನಿಯತ್ತು ಬಿಡದು ಮೂಕ ಪ್ರಾಣಿ ಸಾಕಿದ ಒಡೆಯನಿಗೆ ಎಂದೆಂದೂ ಋಣಿ ವೇದಾವತಿ ಭಟ್ಟ  ಮುಂಬೈ